Enquête publique zu den Aktiounspläng géint de Kaméidi

D’Pläng goufen no de Virgabe vun der europäescher Direktiv 2002/49/CE iwwert den Ëmweltkaméidi, déi an déi national Gesetzgebung transposéiert gouf, erstallt. D'Ausschaffung gouf vun der Ëmweltverwaltung (AEV) koordinéiert, mat Ënnerstëtzung vun engem interministerielle Kommitee a fënnef Aarbechtsgruppen.

Kaméidi ass déi zweet ëmweltbedéngt Quell vu Gesondheetsproblemer no der Loftverschmotzung. D’Direktiv fuerdert d'Kartéierung vum Kaméidi, d'Informatioun vun der Ëffentlechkeet an Aktiounspläng. D'Moossnamen zilen engersäits drop of, d’Belaaschtung ze prevenéieren (z.B. Stadtplanung, roueg Zonen, Bauvirschrëften), an anerersäits de Kaméidi op bestoende Punkten ze reduzéieren (z.B. Reduktioun vum Kaméidi un der Source, Schallschutzwänn, passiv Moossname wann néideg).

D’Aktiounspläng stellen d’national Strategie fir d’Preventioun an d’Sanéierung vu Kaméidisproblemer op Basis vun de strategesche Kaméidiskaarten duer. Si sinn Dokumenter, déi de Wëlle vun der Regierung ausdrécken, fir dem Kaméidi entgéint ze wierken.

• Aktiounsplang géint de Kaméidi vum Stroosseverkéier
• Aktiounsplang géint de Kaméidi vum Schinneverkéier
• Aktiounsplang géint de Kaméidi vum Flugverkéier
• Aktiounsplang géint de Kaméidi an der Agglomeratioun Lëtzebuerg
• Aktiounsplang géint de Kaméidi an der Agglomeratioun vum Süden